ძრავის ზეთი ამცირებს ხახუნს, აცივებს დეტალებს და იცავს ძრავს ჟანგისა და ნადებისგან. სწორედ ამიტომ, მისი დონისა და ხარისხის კონტროლი ერთ-ერთი უმარტივესი, მაგრამ ყველაზე მნიშვნელოვანი პროფილაქტიკური ქმედებაა.

როგორ შევამოწმოთ ზეთის დონე

• დააყენეთ ავტომობილი სწორ ზედაპირზე და გამორთეთ ძრავი
• დაელოდეთ 5-10 წუთს, რომ ზეთი ჩაიწიოს კარტერში
• ამოიღეთ საზომი ჩხირი (щуп), გაწმინდეთ და კვლავ ჩააგდეთ ბოლომდე
• ხელახლა ამოიღეთ და შეამოწმეთ დონე MIN და MAX ნიშნულებს შორის

რაზე მიგვანიშნებს ზეთის ფერი

ახალი ზეთი გამჭვირვალე, ქარვისფერია. თუ ზეთი შავია, სქელი ან შეიცავს მეტალის ნაწილაკებს, ეს ცვლის საჭიროებაზე მიუთითებს. რძისებრი ფერი კი შესაძლოა გამაგრილებელი სითხის შერევის ნიშანი იყოს.

როდის შევცვალოთ

უმეტეს შემთხვევაში ზეთი იცვლება ყოველ 7,000-10,000 კმ-ში ან წელიწადში ერთხელ, თუმცა ზუსტი ინტერვალი დამოკიდებულია ავტომობილსა და ზეთის ტიპზე. მკაცრ პირობებში (ხშირი მოკლე მგზავრობა, მტვერი, საცობები) ინტერვალი მცირდება.

თუ არ ხართ დარწმუნებული, რომელი ზეთი და ფილტრი შეესაბამება თქვენს ავტომობილს, მოგვწერეთ VIN კოდი და ჩვენ შეგირჩევთ თავსებად ვარიანტს.